Чорабиниҳои омўзишию маърифатӣ ва аксияҳои таблиғотӣ
Ҷиҳати тарғибу ташвиқи хизматрасониҳои бонкӣ ва баланд бардоштани маърифати молиявии аҳолӣ оғоз аз моҳи июни соли ҷорӣ дар як қатор боғҳои фарҳангӣ-фароғатӣ ва марказҳои савдои шаҳр бо иштироки волонтёрон ва масъулини Бонк чорабиниҳои омӯзишӣ ва аксияҳои таблиғотӣ доир гардид.
Аз ҷумла, дар боғи фарҳангӣ - фароғатии ба номи устод Садриддин Айнии шаҳри Душанбе дар доираи маросими ҷоизасупории озмуни ҷумҳуриявии «Малакаи касбӣ» миёни муассисаҳои таҳсилоти ибтидоии касбӣ ба иштирокчиёни он варақаҳои иттилоотӣ-тарғиботӣ оид ба хизматрасониҳои гуногуни бонкӣ дастрас гардида, маълумотҳои зарурӣ низ пешниҳод карда шуд.
Дар доираи ҳамкориҳо бо МД «Донишгоҳи байналмилалии сайёҳӣ ва соҳибкории Тоҷикистон» бошад як қатор донишҷўёни бахшҳои иқтисодии муассисаи мазкур аз фаъолияти филиалҳои шаҳри Душанбе ва хизматрасониҳои бонкӣ аз ҷумла вусъат додани ҳисоббаробаркуниҳои ғайринақдӣ, қоидаҳои истифода ва имкониятҳои «Амонат-мобайл», воситаҳои ғайринақдии пардохт, амнияти иқтисоди рақамӣ, саводнокии молиявӣ ва тарзи дуруст ба роҳ мондани муносибат бо мизоҷон ва дигар паҳлуҳои фаъолияти кории Бонк шинос гардиданд.
Ҳамзамон дар як қатор бозорҳои шаҳр аз қабили «Саховат», «Фаровон», «Меҳргон» ва нуқтаҳои фурўши сўзишворӣ миёни соҳибкорон ва аҳолӣ корҳои тарғиботиву ташвиқотӣ оид ба хизматрасониҳои бонкӣ алалхусус низоми пардохти ғайринақдӣ ба роҳ монда шуда, дар баробари ин аз ҷониби масъулини Бонк барномаи “Амонат-мобайл” дар телефони мобилии соҳибкорону мизоҷон ба таври амалӣ насб карда шуд.
